Quanno ‘na cumparsa cumpare p”a primma vota annanze ‘e lluce d”a ribbalta, ‘a voce le tremma, ‘o penziero se fa sciacquero, s’assecca.
So’ poche chille ca so’ nate pe fà ‘o prutagunista; ce vò curaggio, faccia tosta e ‘na bbona dose d’incoscienza. E pò ‘a forza ‘e ll’abbitudine, pe te n’ascì cu stile pure quanno staje int”o stritto. So’ cose ca nun se ‘mparano, so’ cose ca nun se ponnò ‘nzignà.
Haje voglia ‘e lle dicere: “Perciò se qualcuno te lo domanda, tu come rispondi?”
Nossignore; ‘a scena nun sarrà maje naturale. Sonarrà tutto favezo, ‘na cantilena mannata a memoria senz’anema e senza vita.
“Allò, famme sentì nu poco, ‘o fatto d”e tifosi… se qualcuno te lo domanda, tu come rispondi?”.
«Aurelio m’è paaate a… ehm (voce impostata)… E fino a prova contraria, delusi o non delusi, a noi dei tifosi ce ne può fregare o non fregare, perché fino a prova contraria a fine anno abbiamo sempre avuto degli ottimi risultati.»
‘O vvedite? Stu passo è chino ‘e ripetizzione, pause, parole fore luogo. A stessa differenza ca ce sta fra nobiltà e miseria.
‘A stessa differenza ca ce sta fra David López, Koulibaly e ‘na campagna acquiste seria.
A cura di Domenico Ascione (Twitter: @vesuvilandia)
