C”A CAPA DINT”O PALLONE – Senza giacca e cravatta

«È il salto di qualità che volevo», dicette Mazzarri ‘o juorno d”a presentazzione interista. Nu salto d”a pimmece, è stato fino a mmo… a jì addereto. «Quanta strada aggio fatto pe saglì ‘sta fortuna; mmiezo â ggente distratta je nun ero nisciuno». Chella ggente ca nun s’addunava ‘e isso, ‘o cchiù gruosso ‘e tutte quante ll’allenature. Walter Mazzarri da San Vecienzo, in arte “’o mago”, cu nu palmarès ca Mourinho e Ancelotti quanno ‘o vedetteno ‘a primma vota rimanetteno ‘mpressiunate sotto ‘a Botta (“l’aggio ‘nventato je”, rivendicaje superbo dint”a ‘n’intervista). Walter Mazzarri ‘o stratega, capace ‘e mettere in scacco matto ‘e mmeglie difese d’Europa. Sulo c”a bendizzione ‘e San Gennaro e San Paolo, però. Walter “Ponziponzipopopò” Mazzarri, ca fino a quanno ‘o juoco è muollo se joca, e a comme ‘mmece se ‘ntosta nun vede ll’ora ‘e cagnà aria. Walter Mazzarri ‘o scaramantico, nu vaso ô crucefisso, ‘na guardata ô riloggio. E pò ‘o solito spugliariello ‘e mità partita: niente cchiù giacca, niente cchiù cravatta e ‘a squadra puff… comme pe ‘ncantesemo se sceta. Eh, ma chesto se pò ffà a Napule, mio caro, addò sti ccose nun sò overe eppure tutte quante ce credono. Ccà dummeneca ce vonno ‘e tre punte, st’indonesiane nun pazzeano mica. Osinò va a fernì ca te truove senza giacca, cravatta e senza cchiù ‘na fatica.

di Domenico Ascione (Twitter: @vesuvilandia)