C”A CAPA DINT”O PALLONE – FANTANAPULE

Cammenà pe Napule doppo ‘a partita è ‘a cosa cchiù ‘ntrigante e spassosa ca ce sta ‘ncoppa ‘a faccia d’a terra. Tutte quante, da ‘o scarparo ca ‘ntrallazza dint”a puteca all’avvocato ca s’affretta ô tribbunale, passanno p”o barista, ‘o cameriere, ‘o ‘mbrellaro, ‘o mariuolo… tutte quante parlano ‘e una e una cosa sola. ‘O core ‘e ‘sta città sbatte a ‘o ritmo d”a squadra soja, ca ‘a vvote è comme a ‘na sposa fedele, ati vvote n’amante scrianzata ca te denchie ‘e ccorna. «Chillo Hamsìk nun joca dint”o ruolo suojo»; «Je l’aggio sempe ditto ca c’avevamo ‘a piglià nu difensore bbuono». ‘O chianchiere, a mentre d’attaccà c”o spavo ‘na braciola, s’attacca c”o cliente ca sicondo a isso ‘e stu pallone nun capisce proprio niente. «Siente a mme, ccà ce vuleva Reina, un uomo d’esperienza», ripete a pappardella ‘o tipo ca s’ha letto dint”o treno nu miezu articulillo ‘e renza. «Madò, comme me fosse piacuto nu bellu Mascherano, ca ‘o miette allà ddereto e nun te fa passà a nisciuno»; «Ma pure Manolàs, Astori, abbasta ca accattava a quaccheduno.» Se fantastica, se specula, se passa e spassa ‘o tiempo scurdannose d”o riesto. ‘E guaje, ‘e mmiserie, ‘o munno traggicomico. E po’, chello ca è peggio, sti tre cannuole firme ncoppa ‘o stommaco.

di Domenico Ascione (Twitter: @vesuvilandia)