C”a capa dint”o pallone – Sparta fruscio e piglia primmera

‘Na ripresa arrembante, tutta còre e curaggio, nun pò cancellà certo quaratancinche minute ‘e strazio. Doppo ‘a mazzata c”o Chievo, c’aspettavamo’mparanza ‘o riscatto, e ‘mmece è asciuta fora ‘na squadretta piccerella, sciancata, ca a ogne tira ‘mporta pava dazio. Nun ce frusciammo, guagliù, chist’anno nce vò pacienza – “nun ce stanno sorde, ce diceno dall’alto” – eppure ormai se sape ca ‘o dijuno nun lle crede ô sazio. Dijuno comme ‘o stommaco allargato d”o tifoso ‘e panza, chillo ca allucca e sbraita, vò vencere sultanto, chillo ca nun penza. Però quacche raggione a vedè bbuono Atene… ehm, ‘a tene: stu Napule azzuppato, incompiuto, ammezzato me pare overamente nu peccato. Sarria bastato nu colpo ‘e mercato ben assestato, nu paro ‘e scartine piazzate a prezzo ‘e saldo e po’ l’arrivo ‘e quacche giuvinotto baldo. Menu male ca ce stanno Mertens, José María e ‘o Pipita ca ce rischiarano nu pucurillo ‘a vita. Nu dries ca assieme a Marekiaro minaccia fortemente ‘e addventà primmera. A patto ca ‘o slovacco – che s… uzzimma! – se riesce a arricurdà com”era primma.

di Domenico Ascione (Twitter: @vesuvilandia)