C”A CAPA DINT”O PALLONE – El pube de oro

Si nun fosse stato pe Di María, Higuaín e Romero, forze a chest’ora stesseme già parlanno ‘e ‘na stella cadente. Anze, ‘e ‘na stella caduta. “El pibe de oro” è stato nu juocatore unico, ma purtroppo dint’a stu munno incompetente e ingrato nisciuno l’ha capito ancora. Nu munno ca tene afforza bisogno ‘e cunfruntà, fà paravune, scavarattà pe jì truvanno ll’erede d’o Re d”e Re dint”a scartimma. E allora jamme annanze cu ‘sta tarantella stunata ‘e Maradona e Messi; d’altronde, comme se dice, “pure ‘e pullece teneno ‘a tosse”. Ma tanto ‘a gente – ca nun è mica scema – ‘o ccapisce: «il pueblo lo nota che è ancora distante», comme presenza, comme leadership, comme curaggio; ‘nzomma comme tutte cose. «Ay ay ay, è atterrato el Pube», scennenno d”o piedistallo sacrilego addò ‘a stampa – e nun certo ‘a Storia – l’avevano ‘ncurunato Signore. «Ay ay ay, solitario Pube», mo s’ha dda zucà nu cuofano ‘e quistione cumplicate, dummanne scommete ‘ncoppa ‘o pecché e ‘o peccomme contro a ll’Olanda nun è juto manco ciente lire spertusata. Messi è nu talento raro, nu fenomeno senza se e senza ma ca campa ‘e pallone da quanno se sceta â matina fino a quanno se cocca. Però ‘e Maradona nun è manco ‘a gua… rdate nu poco mo che me steva p’ascì d”a vocca.

di Domenico Ascione (Twitter: @vesuvilandia)