Torino, Milano, Napule. Doppo ‘na staggione senza acute (anze, chiena ‘e stecche), pare ca dint”o destino ‘e Erik Lamela ce sta ‘n’ata vota ‘o Belpaese. Però chille d’o Tottenham l’hanno pavato caro e amaro (30 meliune) e dice ca pe meno ‘e vinticinche bombe nun s’accummencia manco ‘a cummersazione. Pecciò l’affare è cumplicato, assaje cumplicato, pure pecché addò nuje mo comme a mo sorde ‘a jettà nun ce ne stanno certo. Ma si ‘a quistione fosse semplice, allora nun ce stesse manco sfizio; oppure ve piace ‘o “Coco” ammunnato e bbuono? E penzà ca ‘o guaglione fosse perfetto p”o sistema ‘e Benítez: corza, tecnica, resistenza atletica e nu sinistro telecummannato ca te fulmina. E pò, comme si nun abbastasse, tene da parta soja ‘a frischezza d”a ggiuventù e ‘a faccia tosta ‘e chi se sape forte. Assieme a Insigne e a Higuaín, saje quanta male ‘e capa p”e ddifese avverse… Ll’unica incognita seria, levato a miezo ‘o prezzo, è appunto ‘a capa: Lamela è nu talento fore scala, però tene ‘na psiche nu pucurillo arravigliata. S’ha dda sentì vezziato, vuluto bene, cocolato, tutte cose ca forze a Napule nun ce putimmo cchiù permettere. Comunque, comm’è comme nun è, Lamela marcia cu direzione Italia. “Marcia” ca da nuje se dice “fraceta”. E “’na mela fraceta” – se sape – “fa ‘nfracetà tutta ‘a sporta”.
di Domenico Ascione (Twitter: @vesuvilandia)
