Ormai è quistione e manco ‘na semmana e po’ sarrà Mondiale. Dudece ‘e “napulitane” arruolate; chi pe se fa ‘na guappa scampagnata, chi pe vedè ‘e se ne turnà c”a Coppa â casa. Ma jamme cu ordine:
Albiol (2) Cu Ramos e Piqué llà mmiezo, pe Raúl nuosto ‘o juoco se fa tuosto. Ma è proprio quanno ‘o juoco se fa tuosto ca ‘e tuoste accummenciano a jucà.
Ghoulam (3) Obbiccanno, se parlave per l’appunto ‘e scampagnate…
Inler (8) Assieme ‘a Behrami, è ‘o core pulsante ‘e ‘na squadra, ‘a Svizzera, ca storicamente ha dato sempe fastidio a paricchia ggente. Però s’ha dda capì quale Inler se presenta: versione ciucculata (“sfìzzero”, me pare loggico) o versione quacche ata cosa.
Higuaín (9) Mo comme a mmo, uno d”e due-tre centrattacco cchiù straordinarie ô munno. Sarrà prutagonista senza dubbio.
Zúñiga (9) Tenè ‘o stesso nummero ‘e maglia d”o Pipita è n’offesa ca s’ammeretasse cinche avemmaria e ventisette ggire ‘e campo ô juorno, eppure ‘na Colombia accussì forte nun l’avevame maje vista.
Behrami (11) ‘Na staggione in chiaroscuro, difficilmente truvarrà culore a giugno. Pure pecché ‘o Carnevale ‘e Rio è passato da nu piezzo.
Mertens (14) Courtois, Vermaelen, Kompany, Hazard, Lukaku, Mertens e nu girone tutt’altro ca impossibbile: accorte ô Belgio, guagliù.
Dzemaili (15) ‘O meno sicuro d”o posto d”e tre cumparielle azzurre. ‘O solito centesimo mancante pe ffà ll’euro; pure pecché ‘a chelli pparte francamente ll’euro nun s’ausa.
Henrique (15) Forze nun parte titolare, però ‘na mano a ‘sta squadra ‘e fenomene ‘a pò ddà sicuramente.
Fernández (17) ‘A classica prova d”o nove p”o Flaco ca pare ca s”e mmiso finalmente ‘ncapa ‘e se fà gruosso.
Insigne (22) ‘A parte d”o pazzo, senza ‘o Pazzo pe definizzione, le tocca a isso; e si nun appiccia ‘a luce Insigne, chest’Italia pò chiammà pure a ll’Enèl pe se fà straccià ‘o cuntratto.
Reina (23) Panchinaro ‘e lusso ‘e nu certo Casillas; rischia ‘e se truvà cu ‘na medaglia ô cuollo senza manco ‘na goccia ‘e sudore ‘ncuollo. Tene ‘o 23, certo, ma chiammatelo scemo…
di Domenico Ascione (Twitter: @vesuvilandia)
