Bona ‘a primma, Rafè: primm’anno a Napule, bella squadra, bellu gruppo e bella Coppa. Dummenca se vota all’Europee, ma nuje ce purtamme annanze c”a fatica (facimme ‘o voto preliminare). Signore e signori… “’a vutata d”e ddoje”:
REINA 7,5: Dicimmece ‘a verità, quacche pellecchia l’ha fatta, però pe ll’esperienza e ‘o carisma ca ha dato â squadra c”o pperdunamme eccomme.
RAFAEL 6,5: Comme se dice, stu guaglione “tene ‘e qqualità”; peccato ca s’è struppiato ‘ncoppa ‘occhiù bbello.
ALBIOL 7: Sicuro, tuosto, elegante, no pe nniente jucava dint”o Real.
BRITOS 5: “’A meglia parola è chella ca nun se dice.” (cit.)
FERNÁNDEZ 6,5: Cu nu cumpagno ‘e reparto comme Albiol sta facenno vedè tutto chello ca se fida ‘e fa, e nun è pe nniente poco.
GHOULAM 6: ‘Na sufficienza stiracchiata, sinceramente. ‘O spettammo ll’anno che trase p”e ccunferme.
HENRIQUE 6,5: Partuto accussì accussì, s’è fatto apprezzà paricchio pe cervella, duttilità e applicazzione.
RÉVEILLÈRE 5,5: Joca o nun joca, cchiù o meno è ‘a stessa cosa.
BEHRAMI 5,5: Fermato da ‘e solite guaje muscolare e da ‘na capa ca pare ca sta sempe cchiù luntana ‘a Napule.
DZEMAILI 5,5: Ormai pur’isso quase completamente fore d”o proggetto tecnico.
HAMŠÍK 4,5: Nu voto accussì fa male ô core, pecché è ‘na bannera, ‘o capitano ‘e nuovo corso, però ll’evidenza ‘e chist’annus horribilis è fin troppo evidente pe nu ll’evidenzià amaramente.
INLER 6: ‘A media matematica fra ‘o 4 e cierti ppartite e quacche 8 sparzo ccà e llà p”o campionato.
JORGINHO 6: Obbillocco, è arrivato Lampard, Gerrard, ‘o nuovo Pirlo; chianu chiano, guagliù, pe mo è sulo Jorginho.
MAGGIO 5,5: Cchiù panchina e infermeria ca campo.
MESTO 6: Pe chellu ppoco ca ha jucato, se l’è cavata nun c’è malaccio.
RADOŠEVIĆ s.v.: Chi?
ZÚÑIGA 5,5: Sta fatto male, sta bbuono; mmm, Zuzù, tu nun c’ha cunta justa proprio…
CALLEJÓN 8,5: Forze l’acquisto cchiù sorprendente e cchiù ‘e sustanza ‘e tutto ‘o mercato azzurro.
HIGUAÍN 7,5: Nu fuoriclasse c”a “f” maiuscola, e chello ca spaventa cchiù assaje (spaventa all’ate, mica a nnuje) è ca tene ancora margine ‘e crescita sconfinate.
INSIGNE 6,5: Falsa partenza, ma pò dint”a ll’urdeme ciente metre ha miso ‘o turbo a ‘na vespa ca nisciuno ‘o cchiappa.
MERTENS 8: C’aspettavame nu bbuono rincalzo, e ‘mmece…
PANDEV 6: ‘A classe nun è acqua, ‘a carta d’identità nemmeno.
ZAPATA 6: Devastante quanno però ormai ‘e ddifese steveno già sott’ô ‘mbrellone.
Mo cazuncielle, cammesella e lente ‘a sole; ce ne jamme tutte quante ‘o Brasole… ehm, ‘o Brasile.
Domenico Ascione (Twitter: @vesuvilandia)
