di Domenico Ascione (Twitter: @vesuvilandia)
Aveva ‘a essere ‘a staggione d”o trionfo, l’anno ca nasceva ‘na nova stella mondiale, ca scuppiava ‘na supernova carriera ‘e nu campione c”a “c” maiuscola. Quatto gol dint”e pprime doje partite e pò ‘o scuro cchiù nniro pe trenta e passa jurnate. N’avimme ditto ‘e tutte ‘e culure, ‘ncuollo a Hamšík: prubbleme ‘e famiglia, nun sta dint”o ruolo suojo, “vabbuò, ma che jate truvanno, ‘o puveriello s’è struppiato… ce vulite dà ‘o tiempo?!”. Eggià, chillu tiempo ca pare ca pe isso nun fernesce maje. Hamšík, ‘n’eterna prumessa ‘e marekiar… ehm, ‘e marenaro, nu Godot ca tutte quante aspettano, ma ca nun tene nisciunu ggenio e se fa vivo. ‘O guaglione tene ‘e qqualità, chesto è certo, però forze ce vulesse nu poco cchiù ‘e faccia tosta, ‘na ntecchia ‘e curaggio ‘e lle dicere: “Marèk, bell’e papà, nun ce staje mica sulo tu, dint”a squadra? Vide comme t’haje ‘a mettere, ca ccà ‘a rosa è competitiva; chi sta cchiù ‘nforma joca, osinò llà sta ‘a porta”. Ma tanto, comme sta miso mo, nun vedesse cchiù manco chella.
