di Domenico Ascione (Twitter: @vesuvilandia)
Manco è fernuta ‘a staggione, manco ‘e venuta ‘a staggione ca già se parla ‘e chi avimme ‘a vennere e chi avimme ‘a accattà ‘ncoppa ‘o mercato ‘e giugno. Pandev ‘o Tottenham pe Lamela e ssorde (nuje a lloro… tu trova a quanto vanno ô chilo!), Insigne si ce danno vinticinche bombe, e Behrami ca comme se sentesse ormai nu pesce fore ‘a ll’accqua. Ajere è asciuto ‘mmiezo pure ll’aggente ‘e nu terzino destro tulipano: «Sì, gli azzurri sono interessati al ragazzo, ma non sono l’unico club ad aver chiesto informazioni. Ad oggi non sono pervenute offerte ufficiali. Il Napoli, comunque, è una grande squadra». E a chisto mo, dico je, chi l’ha Janmaat? Pò Hernández d”o Palermo, Gilardino, Gonalons (si ce fa ‘a grazia), Koulibaly; ‘nzomma, comme a ssempe se fanno tanta chiacchiere a vvacante, allucche, schiamazze, se mette spia pe quanto va ‘o quintale pe se ne turnà â casa cu nu chiletto ‘e pesce. Sperammo sulo ca stavota nun ce facimmo ‘a figura, d”o pesce. Tipo ca ‘e cinque-sei ‘e luglio s’appresenta uno c”a maschera ‘e ll’uomo ragno e asotto aesce ‘n’ata vota Inler! Presidè, stamme dint”e mmane toje pe fà sti bbelli spese, pure pecché ‘o pesce, comme se dice, “feta d”a capa”, e chillo d”o primmo ‘e aprile è passato già ‘a nu mese.
