di Domenico Ascione (Twitter: @vesuvilandia)
‘A paura ‘e turnà sempe areto, ‘a paura ca tutto chesto nun è servuto a niente. Oramai so’ lluntane cchiù ‘e nu lustro chilli nuvanta minute ‘e Genova; nu zero e zero doce comme ‘o zzucchero, ‘a fine ‘e nu malu suonno ca accummenciava c”a “B” e c”a “B” ferneva pure. Ma si da chillu diece ‘e giugno d”o dumilaessette nun fosse cagnato pò granché? Ogne vvota è ‘a stessa storia: “Chisto è ll’anno bbuono, è ll’anno nuosto, è ll’anno d”o Scu… sate, nun se po’ mica ddicere”. E ‘mmece stamme ancora ccà, a nu passo da ‘sta vetta ‘e ll’Everest ca s’alluntana sempe, scumpare all’orizzonte e te fa fesso comme nu miraggio ‘e ll’acqua quanno te muore ‘e sete. Napul’è mille paure: ‘a paura ‘e rimanè cu ‘na vranca ‘e mosche mmano, ‘a paura ‘e truvà ‘na staggiona zoppa, però ‘a paura fa nuvanta, nuvanta comme ‘e minute che mmancano pe scummigglià chi aiza ‘a Coppa.
