di Domenico Ascione (Twitter: @vesuvilandia)
Higuaín manna nu “vafa” a Rafa, Hamšík so’ tre-quatto mise ca nun vede né ‘a porta né ‘a via ‘e s’arrepiglià, De Laurentiis se mette a fà quistione cu ‘e tifose; inzomma, cchiù ca ‘na squadra, stu Napule me pare nu reparto ‘e psichiatria ‘nziriuso e scumbinato. Chi vò fà ‘a prima donna accà, chi vò cummannà allà. Embè, se sape, fino a quanno ‘e ccose vanno lisce, stamme tutte quante c”o core dint”o zucchero e appassiunatamente: «Che bella squadra, che bella città, che bellu pruggietto…». Pò bell’e bbuono abbuscamme nu paro ‘e partite, ‘o spogliatoio se disunisce e accumenciano ‘e ‘ntufamiente, ‘e male ‘e stommaco, ‘e ppretese ca s’avanzano. ‘A varca è sempe chella: chi tene intenzione ‘e scennere, ‘o ddicesse mo oppure llà sta ‘a porta (haje capito, Marek?). Pecciò vedimme ‘e ce piglià ‘sta Coppa, ca ccà nun ce sta ‘a neuro pe ce cunzulà.
