di Domenico Ascione (Twitter: @vesuvilandia)
Nu fulmine ‘e controbbalzo schiattato dint”o set. E quanno maje Lavezzi ha signato nu gol accussì, quanno steva a Napule? Sarrà ll’aria ‘e Parigge, sarrà ll’aria ‘e vittoria (l’avite capita, no?) ca se respira chist’anno ‘e piede d”a Torre, o sarrà forze ca ‘sta squadra è ‘na squadra ‘e fenomene uno meglio ‘e n’ato: Ibra, Pastore, Cavani, Verratti, e chi cchiù ne tene cchiù ne mettesse ‘a coppa. Già, ‘a coppa, chella ca ‘o Paris Saint Germain nun ha maje vinciuto, chella ca ‘o Napule nun ha viste manco c”o bbinocolo. ‘A società sta faticanno bbuono: ‘na cessione eccellente accà, tre-quatto acquiste azzeccate allà, nu prugetto serio, voglia ‘e turnà a cantà e ‘na discreta famme. Certo, nun tenimmo mica ‘e sorde ‘e ll’emiro, però nu Pocho â vota pe’ ffino nuje c’arrevamme.
