di Domenico Ascione (Twitter: @vesuvilandia)
L’avimme ditto nu centenaro, nu migliaro ‘e vote, “ad nauseam”, si vulimme essere signure: ne putimme fà tre o quatto a botta, ma allà ddereto nun è proprio cosa. E ormai nun è cchiù manco ‘na questione personale; Albiol, Britòs, Henrique, Fernandèz… haje voglia a te sbizzarrì c”a formazzione. Ccà ‘o prubblema è serio e s’ha dda risolvere primma ‘e subbeto. È chiaro, se capisce, è nu fatto ‘e capa, ‘e presenza e applicazione. E pò me pare ca mo comme fosse addeventata quasi ‘na maledizzione: “ovvilloco ‘o gol, acchiappa ‘o gol. Tanto se sape, uno ‘o pigliammo sicuro”. E quanno ‘a pienze accussì, ‘o gol ‘o piglie e nun te firme certo manco a uno. Nientimeno ca n’atu ppoco eramo capace ‘e arrepiglià pure a stu Catania ca tene già tre piede dint”a fossa. Nu primmo tempo ‘e lusso: uno, doje, tre e quatto, cu nu Hamšík finalmente a livello, Callejón che ne parlamme a ffà e ‘a duppietta d”o guaglione, ma pò se stuta ‘a luce, ‘e patrune ‘e casa fanno nu paro ‘e cagne e bonanotte ‘e sunature. Cà pò, dico je, cu ‘sta difesa ‘e vuommeco, nu pizzeco ‘e Plašil nun ce facesse male manco a nuje.
