di Domenico Ascione (Twitter: @vesuvilandia)
Noò, e comme c’arrevammo ‘nfi ‘e Torino? Ccà si jucammo accussì contro ‘o Porto, c’hanno ‘a purtà sulo ô spitale, dicesse je. Nuvanta minute ‘e patemiento e sanghe jettato, diece anne perze ogne tiro ‘mporta patuto.
Essì ca ‘e swansease nun sò mica pisce ‘e cannuccia, però llà ddereto è mala acqua seriamente. Nun se pò ffà mica sempe ‘sta storia? C’è juta bbona ‘na vota, ma ‘a siconda ‘o Ddio d”o football nun perdona. Passammo pecché avimmo truvato a ‘na squadretta ‘e miezu calibbro, pecché tenevemo quacche credito arretrato c”a furtuna e pecché forze, rattatis rattandis, ammacaro chisto è ll’anno nuosto. Parlammoce francamente, ‘o livello ‘e Mertens, Higuaín e Callejón sta ‘ncoppa ‘e stelle, e quanno stanno ‘e ggenio pure Marek e Lorenzinho nun pazzeano, però cu tutto ‘o bbene d”o munno tenimmo tre-quatto pisce piscate proprio ‘nfunno. È overo, ormai c’avimmo fatto ‘a vocca bbona, e ‘a ggente s’ha dda arricurdà pure chi simme e ‘a rò venimmo, tenè pacienza e nun fa tanta vuommeche, però pe n’aceno ‘e sale dint”a ll’acqua ‘a perdere ‘sta menesta sustanziosa ‘e nu peccato ‘e Ddio (d”o football). Presidè, simme gruosse, simme belle, ma mo stammo ‘mballo e vulimmo cuntinuà a abballà. Annanze, nun se scappa, vattimmo pure ô Real, eppure ‘sta difesa (senza offesa) fa acqua â pippa. Acquant’è forte ‘o Pipa!
