di Domenico Ascione (Twitter: @vesuvilandia)
Grazie, grazie, grazie, perlomeno cinche-sei vote grazie c”a faccia pe tterra a Rafèle ‘o brasiliano e a Peppeniello nuosto. Guagliù, stasera ce l’avimmo cavata ‘e lusso, no? Doppo ‘e tre passe annanze ‘e coppa, nu guappo passo addereto e nu poco poco ‘e giallo a sotto. È overo, ‘o Swansea c’ha miso curaggio, ‘a solita dose ‘e grinta ingrese e ‘na ‘ntecchia ‘e qualità ‘mmiezo ô campo, però stu Napule se l’avesse avute ‘a magnà dint”a nu sulo muorzo. E invece è asciuta fora ‘na partita scipita, spipitata, senza chell’arraggia ca c’ha permiso ‘e lle cucinà tre purpette â Roma. Hamšík s’è annascuso e s’è acalato ‘a cresta, Henrique e Réveillère hanno fatto addeventà a Bony uno bbony overamente, Higuaín e Callejón nun l’hanno vista manco pe scagno, Maggio ha turnato a essere isso nun ‘ngarranno nu cross. Inzomma pure ‘e pullece (e pure ‘e cigne) teneno ‘a tossa… quanno joca Britòs.
