C”A CAPA DINT”O PALLONE – Ha perzo aroma

di Domenico Ascione (Twitter: @vesuvilandia)

“Booorghetti, Booorghetti, chi ha dda avè ‘o Borghetti?”. Accattatavillo a ‘n’euro fora ô stadio, sentite a mme, ca cchiù tiempo passa, cchiù se n’allicordano ‘e v”o ffà pavà caro (e amaro). Sì, vabbuò, sarrà nu poco sfiatatiello, però quanno se fa sentì ‘a sete ce sta poco ‘a fa ‘e schifettuse. Nun ne parlammo pò ‘e chilli panini sereticce e ‘nguacchiuse ca se venneno ‘ncoppa ê carrettine ambulante, e intanto a ‘n’ora scarza d”a partita pe ppoco nun m”o agliuttevo dint”a nu sulo muorzo. Auuuuuumma! Comme a ‘sta lupacchiotta ô furno. Tre muorze, anzi, tre muorze e bonanotte ê  senature. Nu Napule accussì je nun l’avevo maje visto: applicato, cinico, c”o sanghe a ll’uocchie. Gooooooool! Callejón, ‘o Frecciarossa nuosto. Gooooooool! Higuaín, Edicivene ca c’erano tirato ‘o pacco. Gooooooool! Jorginho, stavota nun ‘e ssalvano manco totti ‘e santi d”o munno. Piiii, piii, piii(ta)! Tre fischie, è ‘a finale. Mo ce vulesse sulo quaccosa ‘a vevere e ppò ‘na capatina ô ce… “Booorghetti, Booorghetti, chi ha dda avè ‘o Borghetti?” Vabbuò, nu poco ‘a perzo aroma, ma Maggio arricreato ‘o stesso.