di Domenico Ascione (Twitter: @vesuvilandia)
Armero va ô Milàn, Reina pare ca se ‘mbarça, Inler nun ‘o vò niscuno, Cannavaro sta tutto arraggiato e dice ca forze ‘o va truvanno l’Inler (ehm, l’Inter), Insigne pò essere ca s’ha dda ‘mparà ll’ingrese… Intanto, ridenno e pazzianno (e pure bunariello), l’avimmo cumbinato nu bellu servizietto a Edy nuosto – no, no chillo ca puntava sempe ‘ncielo; chillo ca sputava sempe ‘nterra. Ca pò, comme se dice? “Nun puntà ‘ncielo…”. Certo, ‘sta Lazio ‘e riserva francamente è poca cosa, però, dint”a ‘na serata senza squilli ‘e tromba, quacche cusarelle ‘e bbuono s’è intravisto eccomme: Albiol s’ha turnato ‘a arricurdà comme se joca, Maggio nun c’è stato male, Fernández l’ha passata liscia, e chilli tre-quatto mostre annanze… Però ‘a nutizzia meglio ‘e tutte quante sta ammiscata pe ‘mmiezo. “In medio stat virtus”, diceva Giulio Cesare, e ‘sta bbona nuvella se chiamma a ritmo e samba e cu nu filo ‘e voce: Jorginho. Chi parte, chi arreja, ‘e ll’ate nun ce ‘mporta, ma isso… Isso è venuto e mo ccà rummane, pecché, si da comme trase in scena se vede ‘o toro, ‘o Napule ha scummigliato overamente ‘na pipita d’oro.
