di Domenico Ascione (Twitter: @vesuvilandia)
E ‘na vota è prena, ‘n’ata vota allatta… Inzomma ce pigliammo a chisto, ce pigliammo a chillo, ma po’, strigne strigne, nun ce pigliammo propeto a nisciuno. Nainggolan è juto â Roma, Antonelli ‘o Presidente ha ditto tiene mmano, e mo dice ca pure ‘o fatto ‘e Gonalons è bello ca zumpato. Nientemeno pare ca ‘o Lione avesse rifiutato 17 meliune uno ‘ncoppa a n’ato. 17 meliune… uanema d”o Priatorio! Comme a ssempe pe n’acino ‘e sale ce perdimmo ‘a menesta pecché, parlammoce cu franchezza, a ‘sta squadra le mancano forse sulo nu paro ‘e piezze gruosse pe s”a jucà c”a Juve seriamente. Nu bbellu centrale ca le facesse cumpagnia a Albiol e nu centrocampista ‘e sustanza e piedi bbuone ô posto ‘e chella meza cazetta (stammo ‘ntiempo ‘e Befana, no?) ‘e Inler. Ca po ‘o guaglione nun fosse manco malamente, sulo ca pare comme si nun tenesse ggenio, cierti vvote. Aveva ‘a essere nu lione arraggiato e invece me pare cchiù nu pecuriello smarruto, ‘mmiezo ô campo. Je t”a passo a tte, tu m”a passe a mme; ogne ttanto nu tiretto ‘mporta, nu lancio bbunariello, e chesto è tutto. Ma comunque, ch’avimmo ‘a fà? Guardammo annanze. Mo s’accummencia a parlà ‘e Parolo (e me pare pure ggiusto), ‘e Obiang, ‘e Jorginho d”o Verona (guarda caso proprio a ‘na semmana d”a partita…); Presidè, Bigon, pigliammancillo a uno, basta ca nun ce facite arradjà ‘n’ata vota.
